De Landschop vun Eckernföör

Wannehr un woans se entstahn is

Dat hett malins en Tiet geven, de driggt denNamen "Weichselkaltzeit". In disse Tiet, de 10.000-70.000 Johren trüch liggt, sünd, vun Skandinavien ut, överbasige, mastige Iesmassen op enkelte Gletschertungen stött, hebbt de in den weken Ünnergrund drückt un so för dat Utsehn vun de lateren Fören (Förden) sorgt. Ok de Form vun de Eckernförer Bucht lett sik woll op en Gletschertung torüchföhren, de in dissen Fall vun Noordoosten vörrückt is.

In dat Rebeet vun dat hütige Eckernföör mutt dat woll in den Ünnergrund en piel opricht Soltstock geven hebben, de den Iesstroom in twee Deeltungen gavelt hett: de nöördliche hett dorna dat Windebyer Noor utspöölt un is wieder in de Richt vun de Hüttener Bargen vörstött, wieldat de südliche den Wittensee formt un de Duvenstedter Bargen opschoven hett. Dat Hele hett sik denn noch mol neeg bi Eckernföör afspeelt. As dat Goosseebecken sacken dä, sünd de Endmoränen vun Haby aflagert worrn. Na dat Smölten vun dat Ies weer de westliche Oostsee toeerst noch dröög, denn de Weltmeeresspegel leeg domolige Tiet um un bi sössdig Meter sieder. Dat änner sik, as dat Water vör bito sössdusend Johren ansteeg un in de Fören (Förden) leep. Siet bummelig tweedusend Johren hett de Meeresspegel den hütigen Stand. Nu kunnen Brandungen un Strömungen anfangen, dat Utsehn vun de Küst to verännern. An de Moränenhööcht ööstlich vun Kiekut un in Eckernföör-Süd hebbt sik Steilöver bildt. Dat Material, dat dorbi afbroken worrn is, is vun dat Water parallel to de Küst vör de Buchten vun den Goossee un dat Windebyer Noor aflagert worrn, in Haken un Nehrungen. Op disse Aart un Wies is de Goossee kumplett vun de Bucht afsneden worrn.

Dat Windebyer Noor hett allerdings en smallen Lenk in’n Noorden vun de Halfinsel, op de de Ooltstadt entstahn is, beholen. Disse Verbinnen is eerst vör hunnert Johren verrohrt worrn. Dat hett dorto föhrt, dat dat Verlannen westlich vun de Ooltstadt Padd üm Padd vörangung, ok dat Utsöten (Aussüßen) vun dat Noor.

Wannel un Schutzmaatnahmen

De Inwahnertall vun Eckernföör is in de verleden Johren stüttig anwussen, dorför sünd gröttere Flagen (Flächen) in’n Süden un Noorden vun de Ooltstadthalfinsel nödig bruukt worrn: To Lasten vun de Naturlandschop, de noch överbleven weer. Gottloff hebbt sik denn in de söventiger Johren vun’t 20. Johrhunnert Umweltschutzgedanken in’t hele Land utbreedt, sünnerlich in Eckernföör. So hett de Raatsversammeln 1984 beslaten, so’n Aart Umweltkataster in‘n Opdrag to geven, de as Grundlaag för tokamen Entscheden gelln schullen. Vundag is de gröttst Deel vun de Vörslääg umsett worrn. De Stadtentwickeln in Noorden is stoppt worrn vun wegen, dat de Naturrebeten dor schütt warrn mööt. Dat hebbt landschopsökologische Erkenntnisse vördag bröcht. Dorgegen sünd nu Flagen (Flächen) in den Südwesten (Domsland), de ökologisch nich so weertvull sünd, to Verfögen stellt un bebuut worrn. Dormit is Eckernföör womööglich de eenzige Stadt in Düütschland, de ehr Stadtentwickeln vun Grund op vun ökologische Insichten afhängig maakt. En beten unwennt (ungewöhnlich) is dat Vörgahn op de neegste Planenstoop: De Grundsätz vun de Gröönornensplaner mööt vörweg dörch de tostännige Fachafdelen gründlich karteert un düütlich beschreven warrn. Eers dorna kann de Arbeit vun de Plaanensafdelen anfangen, wobi dat sülvstverständlich is, dat’n sik gegensiedig afstimmt. Bi dit Verfohren warrt sekerstellt, dat nie Burebeten op’t best in de Landschop integreert, Fehlers minner un so blangenbi dat öörtliche Biotopverbundsystem dörch Nieanlagen vun natürliche Landschopsdele un dat Trüchwanneln (Renaturierung) vun bestahn Biotopen verbetert warrt.

Aver de Stadt sorgt nich blots för dat Utwiesen vun Burebeten. So hett se sik to Opgaav maakt, ehr egen Flagen (Flächen), so as de Naturschutz dat föddert, to ünnerholen un to entwickeln. Dorbi warrt eng mit Naturschutzverbännen un Landschopspleegorganisatschonen tosamenarbeit.

Faat wi tosamen:

De Stadt Eckernföör is för ehrn Spood (Erfolg) in de Rebeten Naturschutz, Landschopsplanen un Umweltschutz mit en Barg Priesen uttekent worrn: 1994/95 as "Bundeshauptstadt für Natur- und Umweltschutz", in de Johren 1988, 1992, 1996 un 2000 as "Umweltfreundliche Gemeinde", 2007 as "Naturschutzkommune" un 2011 as "Biodiversitätskommune". Bi dat Letzt kaam ik doch gehörig in’t Gruveln un fraag mi, wat’n nich mol dor över nadenken schull, Priesen Naams to geven, mit de slichte, eenfache Minschen as Du un Ik wat anfangen köönt.

Mit ehrn kunsequenten, stüttigen Insatz in Umweltfragen is de Standoort Eckernföör ok en wichtige Adress för de Weertschop worrn.