Plattdüütsch

Plattdüütsch – dat is de Spraak, de bet vör fiefhunnert Johren vun all de Minschen in Noorddüütschland (in ‘t Noorden vun de Benrather Spraak-Linie) snackt wurr. Se höör to dat Vulk vun de Sassen (Sachsen) to, de ehr Spraak denn ok mit na England nahmen hebbt. Mit dat hütige Sachsen hett dat nix to kriegen. Ok de Hanse-Kooplüüd snacken Plattdüütsch un so geiht noch en grote Deel vun de skandinaavschen Spraken dorop torüüch.

Hüüt snackt jümmers noch över twee Millionen Minschen Plattdüütsch un veel mehr verstaht dat. Siet 1999 is de Spraak as gröttste Regionalspraak in Düütschland un as "europääsche Kulturspraak" in de Charta vun de europääschen Minnerheiten- un Regionalspraken opnahmen. Siet denn hett se en düchtigen Opswung nahmen. Hüüt lehrt Kinner in 29 Scholen in Sleswig-Holsteen Platt, in en hele Barg Kinnergoorns gifft dat Koppels, de blots op Platt föhrt warrt un an de Hoochschool in Flensborg warrt Schoolmeisters för Plattdüütsch utbild‘t. Platt leevt aver ok in’t Theoter, in de Medien, in de Literatur un överall in uns Ooltdag.

Platt is uns Heimat – un dorför staht wi in!

(Heiko Gauert, Bundesrat für Niederdeutsch, Baas vun de Plattdüütsch Gill in Eckernföör)