auf Hochdeutsch

Stadtentwickeln un Verkehr

Wat verstickt sik achter den Begreep "Stadtplanen"?

To de Opgaven vun Stadtplanen höört de Rebeten Wahnungsbu, Verkehrsanlagen, Anlagen för de Gemeenschop, de Frietiet, de Natur- un Landschopsschutz un allens wat gröön is. Hierför gifft dat Gesetten, de beacht warrn mööt. Dorna mutt de Stadt Buleitplaans opstellen, in de fastleggt warrt, woans Flächen nütt un bebut warrn köönt oder mööt. De Satdt alleen hett dat in de Hand, wannehr en Buleitplaan opstellt, ännert oder optletzt ophoven warrt. Wat verännert warrn schall, doröver striet sik mennigmol de Geister in Politik, Weertschop un bi de Börgers, denn hier geiht dat um Hümpels vun ünnerscheedliche Interessen. De mööt, so suur dat ok warrn kann, ünner en Hoot bröcht warrn. Dorbi geiht dat ü. a. dorüm, de Interessen vun de Börgers to wohren, indem dat allens, wat för un gegen enkelte Sachverholte spricht, lang un breed diskureert warrt. Gesetten, Verornen, Richtlinien un Erlassen, vör allen aver de gesunne Menschenverstand hölpt mit, de bestmöögliche Lösen to finnen, un dat heet: De Stadt mutt bi all dat dorop achten, dat geschichtliche, klimatische, ökologische, topographische un technische Fragen nich to kort kaamt. Mann in de Tünn, wat’n Stück Arbeit.