En lokalet Bündnis för de Familie

Dat Kinner, Jugendliche, Familien un Senioren sünnerlich föddert warrt, is för de Stadt Eckernföör heel un deel wichtig. De Familie is dat soziale Band, dat de Sellschop (noch) tosamenhölt un mutt dorum orrig heegt un pleegt warrn. Bi dat "Lokale Bündnis" hebbt sik Minschen ut ünnerscheedliche sellschopli Krinks friewillig tosamenslaten. Dat sünd Kommunen, Ünnernehmen, Karken, Kamern, Warkschoppen, Verbännen, Stiften, Frie Drägers vun de Kinner- un Jugendhölp un en Barg annere.

Dit Projekt warrt siet 2004 vun dat Bunnesministerium un ut den Europäischen Sozialfonds mit groten Erfolg dragen un betahlt. "Lokale Bündnisse för de Familie" gifft dat an över 600 Standoorten in de hele Bunnesrepublik, dääglich warrt dat mehr. Hier kann jedereen mit hölpen, dat Eckernföör noch familienfründlicher warrt. För disse Rebeten wüllt wi uns sünnerlich insetten:

* Weertschopsünnernehmen
schüllt sik dor för stark maken, dat Familien un Beroop beter ünner en Hoot bröcht warrn köönt. Dorbi geiht dat um bewegliche Arbeitstieden un dat Oppassen vun de Kinner in de Bedrieven.

* Tosamenföhren vun Jung un Oolt
 in so nöömt Mehrgeneratschoonshüüs.

* Schoolwesen, Schoolsozialarbeit, Kinner- un Jugendoppassen
Anbotten so vörholen, dat se nafraagt un wiederentwickelt warrn köönt (ok för de Ferientiet).

* Wahnen un dat Wahnumfeld
Wahnruum, de öllersgerecht is, mutt föddert warrn.

* De ehrenamtliche Arbeit mutt föddert warrn
Dat Ehrenamt bruukt Loff un Anerkennen.

Is dor bi Se Interesse in de Gangen kamen?

Wüllt Se

* mehr över disse Arbeit weten,

* sülvst mitarbeiten,

* Projekte vörstellen un

* Ideen mitbringen?

Hier hebbt Se de Schangs, en familienfründliche Stadt mittogestalten. Dat "Servicebüro Lokales Bündnis für Familie" steiht Se mit veel Raat to Siet.