Raatsversammeln
In Eckernföör heet de Stadtvertreden "Raatsversammeln". De ehr Maten warrt all fief Johr nie wählt un arbeit ehernamtlich. En lütt Opwandsentschädigen gifft dat allerdings, "Sitzungsgelder" nöömt. Totiets sünd dat 41 Raatsfruen un Raatsherren. (Dat kann sik ännern, wenn de Tall vun de Inwahners op un dal geiht.)
Siet de Kommunalwohl an den 6. Mai 2018 verdeelt sik de Sitten so:
- 14 Maten CDU
- 9 Maten SPD
- 8 Maten Bündnis 90/Die Grünen
- 4 Maten SSW
- 3 Maten FDP
- 3 Maten Die LINKE
Allens över de Naams vun de Raatsliddmaten, de Termine vun de Sitten un wat en opto noch weten schull, dat findt Se in uns "Raatsinformatschoonssystem". Wenn de Raatsversammeln Hölp bruukt, kann se Utschüsse wählen laten. An den Hauptutschuss geiht keen Weg vörbi: De mutt wählt warrn. Allgemeen gellt: De Börgermeister/sch is vun Amtswegen de Vertreder vun de Stadt un gliektiedig Baas vun all Mitarbeiters. He bereit de Sitten vun de Raatsversammeln un de Utschüsse vör un mutt dat, wat beslaten worrn is, dörchföhren (laten). Dat gellt ok för all de Opgaven, de em vun’t Gesett her överdragen warrt.
Leit vun de Raatsversammeln
De Raatsversammeln wählt ut ehr Merrn en Baas (Vörsitter/sch). De heet nu Börgervörsteher oder Börgervörstehersch. He / se mutt de Versammeln inberopen, wenn dat nödig is, un in en Ornen / Afloop künnig maken, över wat beraden un beslaten warrn schall. Dat warrt vörher mit den Börgermeister, de Börgermeistersch besnackt. He / se hett dat Leit vun de Sitten un to allereerst dorför to sorgen, dat de Rechten vun de Stadtvertreden wohrt, föddert un de Verhanneln gerecht un ahn Ansehn vun Persoon un Partei föhrt warrt, also ok güntöver Börgermeister/sch. Beide, Börgervörsteher/sch un Börgermeister/sch, vertreedt de Stadt na buten.
Opgaven vun de Raatsversammeln
De Raatsversammeln seggt, wo dat lang geiht för de Verwalten. Allens wat för de Stadt nödig is in Saken Sülvstverwalten, dat entscheedt se un passt op, dat dat ok maakt warrt. Se kann wisse Entscheden op den Börgermeister/sch oder op den Hauptutschuss överdrägen. Dat gifft aver ok Opgaven, de alleen in de Tostännigekeit vun de Raatsversammeln liegt, so to’n Bispill, wenn de Gemeen Vermögen kopen oder verkopen will. Dat gellt ok, wenn Satzungen nie faat oder ännert warrn schüllt. De Sitten vun de Raatsversammeln is grundsätzlich open för all Lüüd. Utnahmen gifft dat denn, wenn to’n Bispill Persönlichkeitsrechte vun Börgers schütt warrn mööt. De Versammeln kann eerst denn to Pott kamen, dat heet besluten, wenn mehr as de Hölft vun de amtliche Tall vun de Maten anwesend sünd. Bi de glieke Antall vun Stimmen mutt en Andrag afwiest warrn.