auf Hochdeutsch

Begröten

Moin, moin, leve Fründinnen un Frünnen vun de plattdüütsche Spraak. Plattdüütsch leevt, sünnerlich in Eckernföör, as wi all weet, un höört to den Alldag vun so mennigeen Börger un Börgersch.

Verene un Verbännen, Theoterkrinks, Musikers un Schrieverslüüd wiest, wat de plattdüütsche Spraak allens beden kann: 

Plattdüütsche Kulturdaag, plattdüütsche Kunferenzen, Lesen, Stadtföhren, Ünnerricht in Kinnergoorns un Scholen, Lesewettbewarven un Spraakkurse schüllt hier nöömt warrn.

Opto bütt de Stadt nu ok online en plattdüütschet Anbott op ehr Homepage. Hier kann en nu Dele vun den Internetoptritt op Plattdüütsch lesen. Ünner "Plattdüütsch" kann en Partners, Henwiese op Literatur , Links to’n Lesen, Smuustern un Nadenken finnen, dorto ok Termine för plattdüütsche Veranstalten. 

Nie is dit: Af November 2016 köönt Minschen, de de Homepage nütten doot, in't Fundbüro Online ünner ,, für die Bürger/ för de Börgers" na Saken söken, de se verloren hebbt.

Wi freut uns över Loff, Kritik un allens, wat uns online wiederhölpen kann.

Veel Spaaß bi’t Söken un Finnen.

 

Jörg Sibbel