auf Hochdeutsch

Biraat för Minschen, de behinnert sünd

Siet August 2005 gifft dat den Biraat för Minschen, de behinnert sünd.

Disse Biraat schall sik för de Interessen vun de Behinnerten stark maken. De tokamen Raat besteiht ut Fruuns- un Mannslüüd, de vun Börgerslüüd, Behinnertenorganisatschonen, Verbännen un de enkelten Frakschonen in de Raatsversammeln vörslaan un na en Entscheden vun den Sozialutschuss as Maten insett warrt.

 

Woans sik de Biraat tosamensett

De Maten vun den Biraat arbeit ehrenamtlich. Dat sünd ach Fruuns- un Mannslüüd.

Wat en över den Biraat weten mutt:

De Biraat för Minschen, de behinnert sünd, wiest Politik, Verwalten un de Öffentlichkeit, wo de Behinnerten de Schoh drücken deit. He sleit Utweeg vör, woans de ene oder anner swore Fraag beter löst warrn kann, sünners bi de Inklusion. Dat is in den Märzmaand 2009 vun de UN-Konventschoon över de Rechten vun Minschen, de behinnert sünd, ü. a. so fastleggt worrn.

Blangen Grootprojekten, so as de Herutgaav vun den Stadtföhrer för Minschen mit Behinnern, gifft dat faken Lösen för heel besünnere Probleme, to'n Bispill dat Leitsystem för blinne Minschen.

De Maten vun den Biraat dreept sik in wisse Afstännen in apen Sitten. Termine hierför kann een in de lokale Presse un in de Infos vun't Raathuus nalesen. Opto laadt de Biraat Eckernförer Börgers un Gäst mit un ahn Behinnern to'n apen Stammdisch in un dat jümmers an den letzten Middeweken in de ungraden Maande. Hier köönt se frie un ahn Dwang jemehr Ideen un Anregen miteenanner uttuuschen.