auf Hochdeutsch

Kultur, Frietiet un Sport

Frietiet in Eckernföör, dat is schiere Lebensfreud

Man, wat kann en in sien Frietiet in Eckernföör allens berieten! Fangt wi foorts mit Watersport an. Hier kann en rodern, paddeln, surfen, seilen, op hoge See angeln, dükern un swemmen, un dat letzt ok in’t Meeerwater-Wellenbad, wenn dat Wedder buten vör de Döör rusig is. Un wat en nich allens to weten kriegen kann, wenn he dat 120 km lange Wannerweegnett rund um Eckernföör to Foot afklappern deit! Mit Fohrrad un en kräftigen Pedd in de Pedalen föhrt em en goot utbuut Radwannerweegnett över 350 km dörch en vun de schönsten Landschoppen vun Sleswig-Holsteen. Fitness-Parcours lang den Noorwannerweeg sorgt mit för dat nödige körperliche Wohlgeföhl. Wokeen dat noch nich langen deit, de kann sien Muskeln mit Hanteln oder an Kraftmaschiens in Fitness-Centers trainieren. För den Sport mit den lütten Ball in frie Natur gifft dat in Olenhoff (Altenhof) en Golfplatz mit 18 Löcker, de sik vör anner Golfanlagen nich to versteken bruukt. Dat gellt ok för de Sportaarten as Tennis, Squash, Skaten un … Un för de Riederie findt en rund um Eckernföör Rietscholen, Pony- un Riederhööf. Un wenn en dat en beten geruhiger mag, leggt he sik bi Sünnenschien eenfach an den Sandstrand un kickt de Seilers to. Oder nimmt sik en Book to Hand oder … slutt enfach de Ogen un dröömt.

 

Sportveranstalten in‘t lopen Johr

* de Sport-Mini-Kongress (Märzmaand)

* de Eckernförer Stadtloop (Aprilmaand)

* de Aalregatta (Junimaand), de internatschonale Seilregatta an den Vördag vun de Kieler Week (Kieler Woche)

* de Staffelmarathon (Junimaand)

* de Oostseetriathlon (Julimaand)

* de Loop in't Leven (Sommer)

* dat Beachbasketball-Turnier mit Mannschoppen ut ganz Düüschland (Augustmaand) un

* de Seniorensportdag »Fit in't Öller« (Septembermaand)

 

 

To de Frietiet höört ok dat Inkopen in Eckernföör

Dat gifft en Barg Grünnen, na Eckernföör to’n Shoppen to fohren (to gahn)

1. De Footgängerstraat bütt en Reeg vun ganz persönliche Geschäften.

2. Neeg bi staht noog Parkplätze to Verfögen.

3. Fein Eten un Drinken kann de Gast na Hartenslust: in de Kieler Straat, rund um den Raathuusmarkt, in de Ooltstadt un an’n Strand. De Eckernförer Frischfisch, warrt seggt, schall en Delikatess ween. Na dat Eten un Drinken is en Spazeergang dörch de Ooltstadtstraten un langs den Haven för den Eckernförer Besöker en "Mutt". He blifft stahn vör de Fischkutters, smitt en Oog op den fangfrischen Kutterfisch un snackt en poor Regen mit de Fischers "op Platt", disse egenordige Spraak, de so warm un hartli un so versapen klingt (Kurt Tuscholsky, Schloß Gripsholm). Wenn he noch nich mööd is, nimmt he den köttsten Weg na den nöördlichen Stadtdeel Borby över dat Water, nauer över en opklappbore Holtbrüch. De verbindt beide Sieden vun den Haven un warrt för dörchfohren Scheep eenfach hoochklappt. Vun hier stiggt he den Petersbarg hooch un hett en wunnerboren Blick op den Haven mit den olen un nien Füertorn. Sien Blick fallt ok op de Standpromenaad, wo en dat Leven un Drieven op de Föör un de Blötenpracht in den Kurpark geneten kann.

Wat sik sünst noch lohnt, sik antokieken

Den Besöker roop ik to, he schall sik Tiet nehmen bi en Rundgang dörch dat Museum, dat in’t ole Raathuus an’n Raathuusmarkt ünnerbröcht worrn is. De Räukerie, dat Badeleven un de Fischerie nehmt blangen en elektro-geschichtliche Sammeln den gröttsten Ruum in. Vun Tiet to Tiet gifft dat Utstellen vun Künstlers, de wiet över de Lannesgrenzen hen bekannt sünd, so to’n Bispill de Noorddüütschen Realisten. De beiden evangelischen Karken in Borby un St. Nicolai köönt dörch mennigeen Kunstschatz op en riekholti Geschichte opmarksom maken. De Bu vun St. Nicolai is man slicht, aver de Gewölbebemalen un de Bronzegussdööp ut dat 16. Johrhunnert, Epitaphien in Holt un Steen, de Kanzel vun Hans Gudewerdt den Ölleren, vör allem de Altar vun Hans Gudewerdt den Jüngeren ut dat Johr 1640, dat allens kann sik sehn laten. De Borbyer Kark is mit ehrn ölleren Deel al in‘t 12. Johrhunnert buut worrn. Ut desülvige Tiet stammt en Relief över dat Südportal, dat in Granit slaan is. Tobinnerst gifft dat en romanischen Dööpsteen ut Gotland to bewunnern.